Rückblick aufs Konflager in Sigriswil

Sonntag
Am Sunntigmorge simmer alli zäme mitem Zug und Bus Richtig Schwande bi Sigriswil losgfahre. Bevor mir s Lagerhuus bezoge händ, hämmer en Spaziergang dur d’Gummischlucht gmacht. Ahschlüssend simmer no über di bekannti Hängebrugg gloffe.
Am Namittag im Lagerhuus hämmer Zimmer und Ämtli verteilt. Mit feine Spaghetti isch dä Sunntig dänn au scho verbii gsi.
Laurine

Montag
Am Mäntig nach em Zmorge hämmer Gschicht vom Hiob ahglueget. Uf de Mittag hämmer wellä uf de Ussichtspunkt «Blueme» go picknicke. Chuum simmer los gloffe, häts ahgfange regne und mir händ müesse umchere.
Zum Ziit überbrücke hämmer no chli g’werwölflet. Vorem Znacht hämmer no de Erfolg vo de Nikita Ducarroz ahgluegt. Später simmer no is Planetarium und händ en spannende Vortrag chöne lose.
Sarina

Dienstag
D’Beatushöhle hämmer am Zistig bsuecht und händ det e tolli Füehrig gha. Nachem Mittag simmer mitem Schiff uf Interlake, wo mer zwei Stund Freiziit gha händ. Zrugg im Lagerhuus Bärgsunne hät en feine Znacht uf eus gwartet.
Wos dunkel gsi isch, hämmer no e Fackelwanderig mit emne chline Kaffichränzli mit de Chüe gmacht.
Alina

Mittwoch / Donnerstag
Mit de Bergbahne simmer am Mittwuchmorge ufs Niederhorn. Obe acho hämmer en Alpe-OL gmacht. Ziel isch bi de Mittelstation gsi, wo mer ahschlüssend ufs Trotti umgstige sind. Nach 12 km Fahrt und paar Verletzige simmer de letzti Teil na mit de Standseilbahn abegfahre. Am spätere Namittag hämmer no Vorbereitige für de Gottesdienst troffe. Mit ere Aabigmahlsfiir hämmer de Tag abgschlosse.
Am nächste Tag hämmer das schön glägne Lagerhuus verlah.
Nina D.